ညီညွတ်သော တိုင်းရင်းသား လူမျိုးများ ဖက်ဒရယ်ကောင်စီ UNFC မှ ကမကထ ပြု၍ လက်ရှိငြိမ်းချမ်းရေး ဖြစ်စဉ်နှင့် ရှေ့အလားအလာ ခေါင်းစဉ်ဖြင့် Stakeholders’ Consultation Meeting ကို ယနေ့ မနက်ပိုင်းမှ စ၍ ထိုင်းနိုင်ငံ ချင်းမိုင်မြို့တွင် စတင်ကျင်းပနေသည်။

အစည်းအဝေးကို ပြည်တွင်း ပြည်ပမှ CSO/CBO လူမှုအဖွဲ့အစည်းမှ ကိုယ်စားလှယ်များ၊ တိုင်းရင်းသား လက်နက်ကိုင် တော်လှန်ရေး အဖွဲ့မှ ကိုယ်စားလှယ်များ၊ တိုင်းရင်းသား လူမျိုးများ မဟာမိတ်အဖွဲ့ UNA မှ ကိုယ်စားလှယ်များ၊ အမျိုးသမီးများအဖွဲ့ချူပ် (မြန်မာနိုင်ငံ) WLB အဖွဲ့မှကိုယ်စားလှယ်များ၊ မြန်မာနိုင်ငံလုံးဆိုင်ရာ ကျောင်းသားများ ကွန်ရက် မှ ကိုယ်စားလှယ်များနှင့် တသီးပုဂ္ဂလ ကိုယ်စားလှယ် ၇၀ ကျော် တက်ရော က် ဆွေးနွေးနေသည်။

ငြိမ်းချမ်းရေး ဖြစ်စဉ်တွင် ပါဝင်သူများအားလုံး သုံးရက်ကြာ ဆွေးနွေးကြမည့် အကြောင်းအရာများတွင် နိုင်ငံရေး ဆွေးနွေးမှု မူဘောင် ပြန်လည်သုံးသပ်ခြင်းနှင့် အမျိုးသားအဆင့် နိုင်ငံရေး ဆွေးနွေးမှု ဖြစ်စဉ်။ ၂၁ ရာစု ပင်လုံ ညီလာခံ နှင့် NCA အကောင်အထည်ဖော်မှုဖြစ်စဉ်။ ငြိမ်းချမ်းရေးဖြစ်စဉ်တွင် CSO Forum အခန်းကဏ္ဍ နှင့် အနေအထား။ ဒေသတွင်းနှင့် နိုင်ငံတကာအတွင်း မြန်မာ့အရေး လှုပ်ရှားမှု အခြေအနေ။ တရားရေးမဏ္ဍိုင် နှင့် ဥပဒေ ပြုပြင်ပြောင်းလဲရေး အခြေအနေ။  လုံခြုံရေးကဏ္ဍ ပြုုပြင်ပြောင်းလဲရေး နှင့် ရှေ့အလားအလာ။ အရပ်ဘက် အဖွဲ့အစည်းများ အခန်းကဏ္ဍ နှင့် အခင်းအကျင်း။ ပညာရေးစနစ် ပြုပြင်ပြောင်းလဲရေး အခြေအနေ များကို ဆွေးနွေးသွားကြမည်ဟု သိရသည်။