နိုင်ငံရေး ဆွေးနွေးမှု မူဘောင် အစည်းအဝေး မြောက်ပိုင်း မဟာမိတ် ၄ ဖွဲ့နှင့် KNPP ကို ဖိတ်

သတင်းနှင့် မီဒီယာ ကွန်ရက်။
၂၀၁၈ ခုနှစ်၊ အောက်တိုဘာလ ၂၉ ရက်။

နိုဝင်ဘာလ လဆန်းတွင် ကျင်းပမည့် နိုင်ငံရေးဆွေးနွေးမှုဆိုင်ရာ မူဘောင်နှင့် လုပ်ငန်းလမ်းညွှန်များ ပြန်လည်သုံးသပ်ခြင်း အလုပ်အဖွဲ့အစည်းအဝေးသို့ မြောက်ပိုင်းတိုင်းရင်းသား လက်နက်ကိုင်အဖွဲ့လေးဖွဲ့နှင့် ကရင်နီ အမျိုးသား တိုးတက်ရေးပါတီ KNPP တို့အား အစိုးရက ဖိတ်ကြားထားသည်ဟု သိရသည်။

အဆိုပါကိစ္စနှင့် ပတ်သက်၍ “ဦးဇော်ဌေး လက်မှတ်ထိုးပြီးတော့ ဖိတ်စာဖိတ်ထားပါတယ်။ အဓိကကတော့ နိုင်ငံရေး ဆွေးနွေးပွဲအတွက် မူဘောင်ကို ပြန်လည်သုံးသပ်ပြီးတော့ မူဘောင်ပြင်ဖို့၊ ဒါကြောင့် မူဘောင်အဆင့်မှာ ပြင်မယ်၊ ပြုမယ် တိုင်ပင်မယ်ဆိုရင် အပစ်ရပ်လက်မှတ်မထိုးသေးတဲ့အဖွဲ့တွေလည်း ဖိတ်ကြားဖို့ သဘောတူပြီးသားဖြစ်ပါတယ်။” ဟု ပအိုဝ်း အမျိုးသားလွတ်မြောက်ရေးအဖွဲ့ချုပ် (PNLO) နာယက ဗိုလ်မှူးကြီး ခွန်ဥက္ကာက ပြောသည်။

အမျိုးသား ပြန်လည်သင့်မြတ်ရေးနှင့် ငြိမ်းချမ်းရေး ဗဟိုဌာနက ဖိတ်ကြားထားသည့် အဖွဲ့များမှာ “ဝ” ပြည်သွေးစည်းညီညွတ်ရေး ပါတီ (UWSP)၊ ကချင်လွတ်မြောက်ရေးအဖွဲ့ /ကချင်လွတ်မြောက်ရေးတပ်မတော် (KIO/KIA)၊ အမျိုးသား ဒီမိုကရက်တစ် မဟာမိတ်တပ်မတော်(NDAA)၊ ရှမ်းပြည်တိုးတက်ရေးပါတီ (SSPP/SSA) နှင့် ကရင်နီအမျိုးသား တိုးတက်ရေးပါတီ(KNPP) တို့ဖြစ်ကြသည်။

သို့သော်လည်း အဆိုပါအစည်းအဝေးသို့ ဖိတ်ကြားခံထားရသည့် အဖွဲ့ဝင်များ တက်ရောက်မည် မတက်ရောက်မည်ကို မသိရသေးဘူးဟု “ဟိုဘက်ကဘယ်လိုအကြောင်းပြန်လည်းတော့ မသိသေးဘူး။ ဦးဇော်ဌေးက ဖိတ်တဲ့လူ၊ သူ့မေးမှသိမယ်။ မိတ္တူတော့ ကျနော်တို့လည်းပေးတယ်။ ဘယ်သူတွေ တက်မယ်ဆိုတာ မသိသေးဘူး” ဗိုလ်မှူးကြီး ခွန်ဥက္ကာက ဆက်ပြောသည်။

ဖိတ်ကြားစာထဲတွင် “ပြည်ထောင်စု ငြိမ်းချမ်းရေးဆွေးနွေးမှု ပူးတွဲကော်မတီ(UPDJC) အစုအဖွဲ့ တစ်ဖွဲ့စီမှ အတွင်းရေးမှူး (၅) ဦး အပါအဝင် (၁၀) ဦးစီပါဝင်သည့် နိုင်ငံရေးဆွေးနွေးမှုဆိုင်ရာ မူဘောင်နှင့် လုပ်ငန်းလမ်းညွှန်များ ပြန်လည်သုံးသပ်ခြင်း အလုပ်အဖွဲ့အစည်းအဝေးကို ရန်ကုန်မြို့ အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာနတွင် နိုဝင်ဘာလ ၁ ရက်နေ့မှ ၃ ရက်နေ့အထိ ကျင်းပသွားမည်ဖြစ်သည်”ဟု ဖော်ပြထားသည်။

“သို့ပါ၍ မြောက်ပိုင်း မဟာမိတ်အဖွဲ့ ၄ ဖွဲ့ နှင့် KNPP မှ ကိုယ်စားလှယ် တစ်ဦးစီ တက်ရောက်နိုင်ပါရန်နှင့် တက်ရောက်မည့် ကိုယ်စားလှယ် အမည်စာရင်းအား စောလျင်စွာ ပြန်ကြားပေးနိုင်ရန် အကြောင်းကြားအပ်ပါသည်” ဟု ဖိတ်ကြားစာထဲတွင် ပါရှိသည်။

ယင်းအဖွဲ့များသည် ပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA) မထိုးရသေးသည့် တိုင်းရင်းသား လက်နက်ကိုင် တော်လှန်ရေး အဖွဲ့အစည်းများ ဖြစ်သည်။

ဗိုလ်မှူးကြီးခွန်ဥက္ကာက “အဓိကတော့ framework မှာ အခက်အခဲတွေ၊ ပြောချင်တဲ့ဟာတွေ ထည့်ချင်တဲ့ဟာ တွေကို အကြံပေးလို့ရတာ ပေါ့နော်။ ပါဝင်ပတ်သတ်လို့ရတယ်။ အဲ့ဒီအပေါ်မှာမှ သူတို့အနေနဲ့ ရောက်လာပြီ လမ်းကြောင်းပွင့်တယ်။ ဒါပေမယ့် framework မကဘူး framework ထက်ပိုတဲ့တခြားကိစ္စလည်း ပြောဆို ဆွေးနွေးဖို့အတွက် အခွင့်အလမ်း ပွင့်သွားတာပေါ့၊ ဆက်သွယ်ရေးလမ်းကြောင်းပွင့်သွားတာပေါ့ ဒါကိုဖွင့် ပေးတဲ့သဘောလည်း ပါပါလိမ့်မယ်” ဟု ဆက်ပြောသည်။

အဆိုပါအစည်းဝေးနှင့် ပတ်သက်၍ “ဝ”ပြည်သွေးစည်းညီညွတ်ရေးပါတီ UWSP လားရှိုးဆက်ဆံရေးရုံး တာဝန်ခံအား ဆက်သွယ်ရာ ကိုယ်စားလှယ်လွှတ်မည် မလွှတ်မည်ကို မသိရသေးကြောင်း အောက်တိုဘာလ ၂၈ ရက်နေ့က သတင်းနှင့် မီဒီယာကွန်ရက်သို့ ပြောသည်။

ကရင်နီ အမျိုးသားတိုးတက်ရေးပါတီ (KNPP) မှ “မနက်ဖြန်ကို ဗဟိုကော်မတီအစည်းအဝေးပြန်ခေါ်ထားတယ်။ အဲ့ဒီမှာမှ တရားဝင်ထုတ်ပြန်မယ်ပေါ့လေ” ဟု အထွေထွေအတွင်းရေးမှူး (၁) ခူးပလူးရယ်က ပြောသည်။

ဖိတ်ကြားခံထားရသည့် တခြားအဖွဲ့များဖြစ်သည့် ကချင်လွတ်မြောက်ရေးအဖွဲ့ /ကချင်လွတ်မြောက်ရေး တပ်မ တော်(KIO/KIA)၊ အမျိုး သား ဒီမိုကရက်တစ် မဟာမိတ်တပ်မတော်(NDAA)၊ ရှမ်းပြည်တိုးတက်ရေးပါတီ (SSPP/SSA)တို့၏ သဘောထားကို သိရှိနိုင်ရန် သတင်းနှင့်မီဒီယာကွန်ရက်မှ ဆက်သွယ်ခဲ့သော်လည်း မရခဲ့ပေ။

အပစ်မရပ်ရသေးသည့် လက်နက်ကိုင် တော်လှန်ရေးအဖွဲ့များအား ဖိတ်ကြားခြင်းနှင့်ပတ်သက်၍ ခူးပလူးရယ်က “ရှေ့ဆက်ငြိမ်းချမ်းရေးပေါ့နော် တနိုင်ငံလုံးအပစ်ခတ်ရပ်စဲရေးကတော့ လက်မှတ်ထိုးတဲ့လူရော မထိုးတဲ့လူရော ဝိုင်းပြီးတော့ ညှိနှိုင်းယူရမယ့် ကိစ္စတွေ အများကြီးရှိတာပေါ့လေ။ အဲ့ဒီမှာများ ကျနော်တို့ကိုပါ တက်ဖို့ဆိုပြီးတော့ ဖိတ်တာလား၊ သို့မဟုတ် အပစ်ရပ် ဒီလက်မှတ်ထိုးထားတဲ့ ဆယ်ဖွဲ့က တောင်းဆိုလို့ ပါလာတာလား သူတို့ကလည်း ရှေ့မတိုးသာ နောက်မဆုတ်သာ အခြေအနေဖြစ်နေတဲ့အချိန်မှာ အားလုံးကိုများ ပါစေချင်တာလား အဲ့လိုမျိုးတော့ သုံးသပ်မိပါတယ်” ဟု ပြောသည်။

အဆိုပါအစည်းအဝေးသို့ မြောက်ပိုင်းအဖွဲ့ဝင်များဖြစ်သည့် တအန်း(ပလောင်) အမျိုးသားလွတ်မြောက်ရေး တပ်မတော် TNLA၊ မြန်မာအမျိုးသားများ ဒီမိုကရက် တစ်မဟာမိတ်တပ်မတော် (MNDAA ကိုးကန့်တပ်ဖွဲ့) နှင့် ရက္ခိုင့်တပ်မတော် AA တို့အား ဖိတ်ကြားထားခြင်း မရှိသော်လည်း ၎င်းအဖွဲ့ (၃) ဖွဲ့မှာ အောက်တိုဘာလ ၃၁ ရက်နေ့တွင် တရုတ်နိုင်ငံ၊ ကူမင်းမြို့တွင် ငြိမ်းချမ်းရေးကော်မရှင်နှင့် တွေ့ဆုံသွားမည်ဖြစ်သည်။

သုံးရက်ကြာကျင်းပမည့် အဆိုပါအစည်းအဝေးတွင် အစိုးရ၊ လွှတ်တော်၊ တပ်မတော် အစုအဖွဲ့မှ ကိုယ်စား လှယ် ၁၀ ဦး၊ နိုင်ငံရေးပါတီအစုအဖွဲ့ မှ ကိုယ်စားလှယ် ၁၀ ဦးနှင့် တိုင်းရင်း သားလက်နက်ကိုင် အစုအဖွဲ့မှ ကိုယ်စားလှယ် ၁၀ ဦး တက်ရောက်မည်ဖြစ်သည်ဟု သိရသည်။