ရှမ်းခေါင်းဆောင် တစ်ဦး ကွယ်လွန်

အောင်မိုးမြင့်။
သြဂုတ်လ ၁၄ ရက်၊ ၂၀၀၇ ခုနှစ်။

ရှမ်းပြည်တိုးတက်ရေးပါတီ (အက်စ်အက်စ်ပီပီ)၏ ပထမဆုံးဥက္ကဌနှင့် ရှမ်းပြည်တပ်မတော်(အက်စ်အက်စ်အေ)အဖွဲ့၏ စစ်ဦးစီးချုပ် တာဝန်များကို ထမ်းဆောင်ခဲ့သည့် ရှမ်းခေါင်းဆောင်တစ်ဦးဖြစ်သူ စပ်ခွန်ကြာနု (ခေါ်) စပ်ဆိုင်ဆစ် အသက်(၇၂)နှစ် သည် ထိုင်းနိုင်ငံ ချင်းမိုင်မြို့တွင် အဆုတ်နာရောဂါဖြင့် ယမန်နေ့ ညနေ ၅ နာရီ ခန့်တွင် ကွယ်လွန်သွားသည်။

ရှမ်းပြည်နယ် ဖွဲ့စည်းပုံရေးဆွဲရေး ကော်မတီ ဥက္ကဌ နှင့် ရှမ်းဒီမိုကရက်တစ်သမဂ္ဂ (အက်စ်ဒီယူ)၏ ယာယီ ဥက္ကဌ အဖြစ် တာဝန်ယူထားသူ ခွန်ကြာနု ကွယ်လွန်သွားခြင်းသည် ပြည်ထောင်စု တစ်ဝှမ်းလုံးအတွက် ဆုံးရှုံးမှု တစ်ခု ဖြစ်သည်ဟု တိုင်းရင်းသားလူမျိုးများကောင်စီ (အီးအဲန်စီ)၏ အထွေထွေအတွင်းရေးမှူး ဒေါက်တာ ဆလိုင်း လျန်းမုန်းဆာခေါင်း က ပြောသည်။

“ခွန်ကြာနု ဟာ သူ့တသက်တာလုံး ရှမ်းလူမျိုးအတွက်သာမကဘဲနဲ့ တိုင်းရင်းသား လူမျိုးအားလုံး အတွက် တော်လှန်တိုက်ပွဲဝင်ခဲ့တဲ့ ခေါင်းဆောင်တစ်ယောက်ဖြစ်ပါတယ်။”

“သူရဲ့လုပ်ဆောင်ချက်အားလုံးကို ပြန်သုံးသပ်ကြည့်လို့ရှိရင် သူ့ရဲ့ ပေါ်လစီတစ်ခုလုံးက ပင်လုံစိတ် ဓါတ် ပြည်ထောင်စုစိတ်ဓါတ်  ဆိုတဲ့အပေါ်မှာပဲ သူ အမြဲတမ်း အခြေခံပြီးတော့ အလုပ်လုပ်နေတာကို တွေ့ရပါတယ်။ အဲ့ဒီအတွက် ပြည်ထောင်စုတစ်ဝှမ်းလုံးရဲ့ ဆုံးရှုံမှုကြီးဖြစ်ပါတယ်လို့ ကျနော်တို့ တိုင်း ရင်းသား လူမျိုးများကောင်စီက မြင်ပါတယ်။”

စ၀်ခွန်ကြာနု ခေါ် စ၀်ဆိုင်းဆစ် ကို ပင်လုံ လက်မှတ်ရေးထိုးရာတွင် အထင်ကရ ပါဝင်ခဲ့သည့် ခွန်ကြာဘူး နှင့် မိခင် နန်းခင်မကြီးတို့က ၁၉၃၅ ခုနှစ်တွင် ရှမ်းပြည်နယ်တောင်ကြီးမြို့၌ မွေးဖွားခဲ့ပြီး မွေးချင်း ၁၀ ယောက်ထဲမှ ဆဌမမြောက်သား ဖြစ်သည်။

တိုင်းရင်းသားလူမျိုးများအရေးနှင့် ပြည်ထောင်စုအရေးကိစ္စများအတွက် တိုင်းရင်းသား ခေါင်းဆောင်များ အချင်း ချင်း လက်တွဲလုပ်ကိုင်ခဲ့ရာတွင် စ၀်ခွန်ကြာနုသည် အမှတ်ထင်ကျန်ရစ်မည့် လုပ်ဆောင်ချက်များလည်း ရှိခဲ့သည် ဟု ဆလိုင်းလျန်းမုန်းဆာခေါင်း က ဆက်ရှင်းပြသည်။

“သူရဲ့လုပ်ဆောင်မှုထဲမှာ အမွန်မြတ်ဆုံးကို ကျနော်တို့ ပြောလိုက်လို့ရှိရင် ပြည်နယ်ဖွဲ့စည်းပုံ အခြေခံ ဥပဒေရေးဆွဲရေးလုပ်ငန်းနဲ့ ဖယ်ဒရယ်ဖွဲ့စည်းပုံ အခြေခံဥပဒေရေးဆွဲရေးလုပ်ငန်း။ ပြီးတော့ ကျနော် တို့ ပြည်တောင်စု အတွင်းမှာဖြစ်နေတဲ့ တိုင်းရင်းသား လူမျိုးအားလုံး ချစ်ကြည်ရေးနဲ့ပြန်လည် သင့်မြတ်ရေး အတွက် အမျိုးသားပြန်လည်သင့်မြတ်ရေး လုပ်ငန်းတွေ ဦးဆောင်ပြီးတော့ ပါဝင်ခဲ့ ပြီးတော့မှ လုပ်ဆောင်ခဲ့တာတွေဟာ ကျနော်တို့ မေ့လို့မရတဲ့ ကြီးမားတဲ့ လုပ်ဆောင်ချက်တွေ ဖြစ်ပါ တယ်။”

တိုင်းရင်းသားခေါင်းဆောင်များအတွက်သာမက လူငယ်မျိုးဆက်သစ်များအတွက်လည်း စ၀်ခွန်ကြာနုသည် လေး စား သမှုခံရသော ခေါင်းဆောင်တဦးဖြစ်သည်။

ရှမ်းလူငယ်များကွန်ယက်(SYNG)က ဒုဥက္ကဌ ဖြစ်သူ စိုင်းမွန်း က ခွန်ကြာနု ကွယ်လွန်သွားသည့်အတွက် ရှမ်းလူ ငယ်များအနေဖြင့် ဆုံးရှုံးမှုကြီး တစ်ခုအနေဖြင့် ခံစားရသည်ဟု ပြောသည်။

“ရှမ်းလူငယ်တွေရဲ့ လက်ဦးဆရာလို့လည်း ပြောလို့ရပါတယ်။ ဒီ စ၀်ဆိုင်ဆစ်က ဒီကျနော်တို့လူငယ် တွေကို အများကြီးကို ဘာဖြစ်လို့လည်းဆို ကျနော်ဆိုရင် သားလိုလိုပဲ ကျနော် အဲ့လိုမျိုးဖြစ်ပါတယ် ။ ဒါက ကျနော့်တစ်ယောက်တည်းမဟုတ်ဘဲနဲ့ တစ်ခြားတိုင်းရင်း သားတွေကောပါ အဲ့လိုမျိုးခံစားမှု လေးတွေရှိပါတယ်။ ပြီးတော့မှ ကျနော်တို့ ရှမ်းတွေအတွက်မှာရော ဒါကတော့ တော်တော်ကြီးမားတဲ့ လစ်ဟာချက်ကြီး တစ်ခုဖြစ်သွားတာပေါ့ဗျာ ကျနော်တို့။ လှေခါးထစ်ကြီး တစ်ထစ်ပျောက်သွားသလို မျိုး ဖြစ်နေတယ် ကျနော်တို့အတွက်။ ဒါက  ကျနော်တို့ ရှမ်းလူငယ်တွေရဲ့ ခံစားချက်လေးပေါ့။ ”

ခွန်ကြာနု ကွယ်လွန်သွားချိန်တွင် သူ၏ဇနီးနှင့်အတူ သားသုံးဦးနှင့် သမီးတစ်ဦး ကျန်ရစ်ခဲ့ပြီး သူ၏ရုပ်အလောင်း ကို ၁၈ ရက်နေ့တွင် မီးသဂြိုလ်မည်ဟု ဈာပန ကော်မတီက ဆုံးဖြတ်ထားသည်။

ခွန်ကြာနုသည် ရန်ကုန်တက္ကသိုလ်မှ အိုင်အက်စ်စီ ဘွဲ့ကိုရရှိခဲ့သူတစ်ဦးဖြစ်ပြီး ရန်ကုန်တက္ကသိုလ်မှာ ရှိစဉ်က ရှမ်း စာပေ၊ ယဉ်ကျေးမှုအသင်းနှင့် ရှမ်းပြည်ကျောင်းသား များ အဖွဲ့တွင်ပါဝင်ခဲ့သူတစ်ဦးဖြစ်သည်။

စ၀်ခွန်ကြာနုသည် ၁၉၅၉  ခုနှစ်တွင် နွံစစ်ဟန်ရှမ်းတော်လှန်ရေး အဖွဲ့ကို ၀င်ရောက်ခဲ့သည်။ ၁၉၆၀ ခုနှစ်တွင်  ရှမ်းပြည်တပ်မတော် (အက်စ်အက်စ်အေ)ကို ထူထောင်ရာမှာ ပါဝင်ခဲ့ပြီး တပ်မဟာ ၃ တပ်မှူးအဖြစ် တာဝန်ယူခဲ့ ပါသည်။

၁၉၇၁ ခုနှစ် အက်စ်အက်စ်အေ၏ နိုင်ငံရေးဦးဆောင်ပါတီဖြစ်သည့် ရှမ်းပြည်တိုးတက်ရေးပါတီ (အက်စ်အက်စ် ပီပီ) ကို စတင်ဖွဲ့စည်းချိန်တွင် ပါတီဥက္ကဌနှင့် စစ်ဦးစီးချုပ် တာဝန်များကို ထမ်းဆောင်ခဲ့သည်။

၁၉၇၆ ခုနှစ်တွင် အက်စ်အက်စ်ပီပီထဲတွင် ကွန်မြူနစ်ပါတီကိုလိုလားသော တပ်မှူးများနေရာရလာပြီး နောက်ပိုင်း လက်နက်ကိုင်တော်လှန်ရေးမှ အနားယူခဲ့သည်။

၁၉၉၂ ခုနှစ်တွင် ပြည်ပရောက် ရှမ်းနိုင်ငံရေး အင်အားစုတွေ ပြန်လည်စုစည်းခဲ့ပြီး အက်စ်အက်စ်အို (ရှမ်းပြည် အဖွဲ့ချုပ်) ကို တည်ထောင်ခဲ့ပါသည်။

၂၀၀၁ ခုနှစ်မှာတော့ တိုင်းရင်းသားလူမျိုးစုများ သွေးစည်းခိုင်မာရေးနှင့် ပူးပေါင်းဆောင်ရွက်ရေး ကော်မတီ (အီး အဲန်အက်စ်စီစီ) ကို တည်ထောင်ရာတွင် တခြားတိုင်းရင်းသားခေါင်းဆောင်များနှင့်အတူ ပါဝင်ခဲ့သည်။ ယင်း အဖွဲ့ကို နောက်ပိုင်းတွင် အီးအဲန်စီ (တိုင်းရင်းသား လူမျိုးများ ကောင်စီ) အဖြစ်ပြောင်းလဲခေါ်ခဲ့သည်။

၂၀၀၄ ခုနှစ်မှစ၍ ရှမ်းဒီမိုကရက်တစ် သမဂ္ဂ(အက်စ်ဒီယူ) အဖွဲ့မှာ ယာယီဥက္ကဌ အဖြစ် ကွယ်လွန်ချိန်အထိ တာဝန်ယူခဲ့ပြီး ကွယ်လွန်ချိန်တွင် ရှမ်းပြည်နယ် ဖွဲ့စည်းပုံ အခြေခံ ဥပဒေရေးဆွဲရေး ကော်မတီတွင် ဥက္ကဌ အဖြစ် တာဝန်ယူနေသူတစ်ဦးဖြစ်သည်။