၂လသားကလေးအပါအ၀င် ကရင် အရပ်သား ၃၈ယောက်ကို စစ်တပ်က သတ်ဖြတ်

သတင်းနှင့်မီဒီယာကွန်ယက်။
သြဂုတ်လ ၂၁ရက်၊ ၂၀၀၇ခုနှစ်။

မြန်မာစစ်အစိုးရသည် တောင်ငူခရိုင်တွင် စစ်ဆင်ရေးများတိုးမြှင့်လုပ်ဆောင်နေပြီး ယခုနှစ် ဇန်န၀ါရီလမှ မေလ အတွင်း ၂လသားအရွယ်ကလေးတဦးအပါအ၀င် ကရင်လူမျိုး အရပ်သား ၃၈ဦးကို သတ်ဖြတ်ခဲ့သည်ဟု ကရင် လူ့အခွင့်အရေးအဖွဲ့ (KHRG)က ယနေ့ အစီရင်ခံစာထုတ်ပြန်လိုက်သည်။

KHRG က တောင်ငူခရိုင်မှ အရပ်သားများ၏ အခြေအနေကိုဖော်ပြထားသော Landmines, killings and food destruction: Civilian life in Toungoo district အမည်ရှိ အစီရင်ခံစာကို ၄င်းတို့၏ အင်တာနက်စာမျက်နှာ(www.khrg.org)မှတဆင့် ယနေ့ထုတ်ပြန်လိုက်ခြင်းဖြစ်သည်။

သတ်ဖြတ်ခံရသည့် သူများတွင် ကလေး၃ဦးပါဝင်သည်ဟု KHRG ပြောရေးဆိုခွင့်ရှိသူ စောပိုရှန်းက ယခုလို ပြောသည်။

“သတ်ခံရတဲ့ ၃၈ယောက်မှာ သုံးယောက်က ကလေးပေါ့နော်။ တယောက်ကတော့ ၂လမှာ။”

အခြားကလေးနှစ်ဦးမှာ အသက် ၇နှစ်နှင့် ၁၅နှစ်အရွယ်ဖြစ်သည်ဟု အစီရင်ခံစာတွင်ဖော်ပြထားသည်။

ယခုကဲ့သို့သတ်ဖြတ်ခံရသော ရွာသားများမှာ စစ်အစိုးရ၏ ပေါ်တာစေခိုင်းမှု၊ အတင်းအကျပ်နေရာရွေ့ပြောင်း မှုနှင့် အခြားညှင်းပန်းနှိပ်စက်မှုများကို မခံလို၍ တောတောင်များအတွင်း လှည့်လည်ပုန်းအောင်းနေထိုင်သော IDPs များဖြစ်ကာ ၄င်းတို့ကို ကရင် အမျိုးသား အစည်းအရုံး( KNU)ကို ကူညီသူများအဖြစ် မြန်မာအစိုးရ တပ်ဖွဲ့က  သတ်မှတ်ကာသတ်ဖြတ်ခြင်းဖြစ်သည်ဟု KHRG အဖွဲ့ မှ နော်ရီဘက်ကာက ပြောသည်။

“နအဖကနေ ဘယ်လိုပြောလဲဆိုတော့ ဒီရွာသားတွေဟာဆိုရင် ကေအဲန်ယူရဲ့ ကျောရိုးဖြစ်တာပေါ့လေ။ ကေအဲန်ယူအတွက် အထောက်အကူပြုတဲ့သူတွေ၊ ဒါကြောင့်မို့သူက တိုက်ထုတ်ချင်တယ်။ ဒါပေမယ့် ဒီရွာသားတွေက ကေအဲန်ယူအတွက် ဘာမှ မဟုတ်ဘူးလေ။ ဘာမှ ကူညီတာမရှိဘူး။ သူတို့ကို သက် သက်လာတိုက်ထုတ်တာပဲ။ လာပြီးတော့ သတ်ဖြတ်တာပဲ။ အဓိကကတော့ ဒီရွာသားတွေကို ချုပ်ကိုင် လို့ ရအောင်ပေါ့လေ။”

ကရင်အရပ်သားများသည် တောင်ယာစပါးခင်းများ၌ အလုပ်လုပ်ကိုင်နေစဉ်၊ တောတောင်အတွင်း၌ ဟင်းသီး ဟင်းရွက်ရှာဖွေစဉ် သို့မဟုတ် ခရီးသွားနေစဉ် မြန်မာအစိုးရတပ်ဖွဲ့တွေ့ရှိပါက ပစ်ခတ်သတ်ဖြတ်ခံကြရပြီး အချို့မှာ မြေမြုပ်မိုင်းနင်းမိ၍ သေဆုံးကြရကာ အစိုးရတပ်နှင့် ကေအဲန်ယူတပ်များသည် တောင်ငူခရိုင်အတွင်း တွင် မြေမြုပ်မိုင်းများ သုံးစွဲနေကြောင်း အစီရင်ခံစာတွင် ဖော်ပြထားသည်။

ထို့ပြင် မြန်မာအစိုးရတပ်ဖွဲ့ဝင်များသည် ရွာသားများအား စုစည်းကျေးရွာများသို့ လာရောက် နေထိုင်စေရန် တောင်ယာစပါးခင်းများနှင့် ရွာသားများသိုလှောင်ထားသော စပါးကျီများကို ရှာဖွေ ဖျက်ဆီးပစ်နေကြောင်း၊ ထို့ ကြောင့် ရွာသားများမှာ အငတ်ဘေးနှင့် ရင်ဆိုင်ရကာ ထိုင်းမြန်မာနယ်စပ်ရှိ ဒုက္ခသည်စခန်းများသို့ ထွက်ပြေး လာကြကြောင်း ယင်းအစီရင်ခံစာတွင် ဆက်လက်ဖော်ပြသည်။

အစီရင်ခံစာကို KHRG မှ သတင်းအချက်အလက်ကောက်ယူသူများက တောင်ငူခရိုင်ရှိ ဒေသခံများနှင့် ဒုက္ခ သည် စခန်းသို့ ရောက်ရှိလာသူများကို တွေ့ဆုံမေးမြန်း၍ ထုတ်ပြန်ခြင်းဖြစ်သည်ဟု နော်ရီဘက်ကာက ပြော သည်။

ကရင်ပြည်နယ်အတွင်းရှိ ပြည်တွင်းဒုက္ခသည်များ(IDPs)ကို Free Burma Ranger ခေါ် လူမှုကူညီရေးအသင်းက ၂၀၀၆ခုနှစ် ဖေဖော်ဝါရီလမှ စတင်ခဲ့သော မြန်မာစစ်တပ်၏ ထိုးစစ်ကြောင့် ယခုအခါ ကရင် IDPs ၃သောင်း ကျော်ရှိလာနေသည်ဟု သတင်းထုတ်ပြန်ထားသည်။

မြန်မာစစ်အစိုးရသည် ပြည်ပအခြေစိုက် လူ့အခွင့်အရေးအဖွဲ့နှင့် အမျိုးသမီးအဖွဲ့ အစည်းများမှ ထုတ်ပြန်သော အစီရင်ခံစာများကို မဟုတ်မမှန် လုပ်ကြံရေးသားထားမှုများဖြစ်ကြောင်း အစဉ်တစိုက် ငြင်းဆိုခဲ့သည်။