မဲဆောက်တွင် မြန်မာသံဃာများဦးဆောင်၍ ဘာသာပေါင်းစုံ လမ်းလျှောက်ဆုတောင်းပွဲ ကျင်းပ

နွယ်လေး။
စက်တင်ဘာလ ၂၁ ရက် ၊၂၀၀၉ ခုနှစ်။

မြန်မာပြည်ငြိမ်းချမ်းစေရန်အတွက် ထိုင်း-မြန်မာနယ်စပ် မဲဆောက်တွင် သံဃာတော်များ၊ ဘာသာပေါင်းစုံမှ မြန် မာနိုင်ငံသားများနှင့် နိုင်ငံခြားသားများပူးပေါင်းကာ ယနေ့ကျရောက်သည့် အပြည်ပြည်ဆိုင်ရာ ငြိမ်းချမ်းရေးနေ့ တွင် လမ်းလျှောက် ဆုတောင်းပွဲ ကျင်းပခဲ့သည်။

လမ်းလျှောက်ဆုတောင်းပွဲတွင် ပါဝင်ချီတက်သည့် ဦှးဣဿရိယက “မြန်မာနိုင်ငံဟာ ငြိမ်းချမ်းရေး မရသေး ဘူး၊ ငြိမ်းချမ်းရေး အတွက် အသက်ပေးနေရတယ်။ သံဃာတော်တွေ ငြိမ်းချမ်းရေးလမ်း လျှောက်မိ တာနဲ့ နအဖစစ်အစိုးရက ဖျက်ဆီးခဲ့လို့ အသက်ပေးခဲ့ရတယ်။ ထောင်ထဲမှာနေကြရတယ်။” ဟု မိန့်ကြား သည်။

ဖမ်းဆီးခံထားရသည့် သံဃာတော် အပါအ၀င် သာသနာ့ အာဇာနည် ကျောင်းသားများ အားလုံး ထောင်တွင်းမှ လွတ်ကင်းပြီး မြန်မာပြည်သူများအားလုံး စစ်ဘေးဒဏ်မှ လွတ်ကင်း ငြိမ်းချမ်းကြပါစေ၊ လူအချင်းချင်း နှိပ်စက် ခြင်းကင်းဝေးကြပါစေ စသဖြင့် ဆုတောင်းသည်ဟု ဆက်မိန့်ကြားသည်။

မြန်မာပြည်သူလူထုသည် သံဃာတော်များနှင့်အတူမြန်မာပြည် ငြိမ်းချမ်းသည့်အထိ တက်ညီ လက်ညီ အသက် ပေးပူးပေါင်း ပါဝင်ဆောင်ရွက်ကြရန် မိမိတို့နိုင်ငံငြိမ်းချမ်းရေးအတွက် တိုက်ပွဲဝင်ရန် နိုင်ငံတကာမှလည်း သံဃာ တော်များ ငြိမ်းချမ်းရေးလမ်းလျှောက်ပွဲကို ကူညီ အားပေးစေရန် လမ်းလျှောက်ဆုတောင်းပွဲ ပြုလုပ်ခြင်းဖြစ်သည် ဟု ဦးဣဿရိယက ဆက်မိန့်ကြားသည်။

“၀မ်းနည်းစရာကောင်းတာက မိမိနိုင်ငံမှာ ဒီလိုငြိမ်းချမ်းစွာ လမ်းလျှောက်ခွင့် မပြုတာ ကိုယ့်အမိမြေ မှာ ခြေချခွင့်မရတာ ၀မ်းနည်းပါတယ်။ ဘာသာပေါင်းစုံနဲ့ ခုလိုငြိမ်းငြိမ်းချမ်း လျှောက်ခွင့် မရတဲ့ ကိုယ့် နိုင်ငံတွက် အင်မတန်ဝမ်းနည်းပါတယ်။”

လမ်းလျှောက်ဆုတောင်းပွဲတွင် သံဃာတော်များ မြန်မာ့အရေး လှုပ်ရှားတက်ကြွသည့် အဖွဲ့အစည်းအချို့၊ မဲ ဆောက်ရှိ မြန်မာအလုပ်သမားအဖွဲ့အစည်းများ၊ အစ္စလာမ်ဘာသာဝင် ကိုယ်စားလှယ်၊ ခရစ်ယာန်ဘာသာဝင် ကိုယ်စားလှယ်များနှင့် အတူ ထိုင်းနှင့် နိုင်ငံခြားသား များ မဲဆောက် အာဇာနည်ဗိမာန်တွင် ယနေ့ နံနက် (၉)နာရီတွင် ဆုတောင်းပြီး ပန်းခြံသို့ ဆက်လက် ချီတက်ခဲ့သည်ဟု လမ်းလျှောက်ဆုတောင်းပွဲတွင် ပါဝင်သူ လိုင်းသစ်ကျောင်း တာဝန်ခံ ကိုရန်မျိုးအောင်က ယခုလိုပြောသည်။

“ငြိမ်းချမ်းရေး မပြောနဲ့ လူတစ်ဦးချင်းစီရဲ့ လွတ်လပ်ခွင့်တောင် ထ်ိန်းချုပ်ခံနေရတယ်။ ကမ္ဘာ ငြိမ်းချမ်း သွားတဲ့တိုင် ဘာသာတရားကို စော်ကားထားတဲ့ ကျနော်တို့ မြန်မာပြည်က ငြိမ်းချမ်းပါ့မလား ကမ္ဘာ့ ငြိမ်းချမ်းရေးနေ့မှာ မြန်မာပြည်လဲငြိမ်းချမ်းစေချင်တယ်။”

မြန်မာပြည် အရေးတွင် မြန်မာပြည်သားနှင့် အတူ ထိုင်းအပြင် အခြားနိုင်ငံခြားသားများက တက်ကြွစွာ ပါဝင်ချီ တက်လှုပ်ရှားခြင်းအတွက် ၀မ်းသာဝမ်းနည်း ခံစားမိသည်ဟု ၎င်းက ဆက်ပြောသည်။

မြန်မာပြည်ငြိမ်းချမ်းပါစေ စသည့်ပိုစတာစာတမ်းများကိုင်ဆောင်ပြီး လမ်းလျှောက်ဆုတောင်းပွဲတွင် ခြောက် ယောက်တစ်တွဲ တန်းစီ၍ ရာနှင့်ချီသည့် လှမ်းလျှောက်သူများကို သံဃာတော်များက ရှေ့မှဦးဆောင်ချီတက် မေ တ္တာသုတ်ရွတ်ဆိုကာ မဲဆောက်ပန်းခြံမှ မွန်းလွှဲပိုင်းတွင် စတင်ချီတက်ပြီး မဲဆောက်ငြိမ်းချမ်းရေး တံတားထိပ် တွင် ယနေ့ညနေ (၄ ) နာရီခန့် ထပ်မံပြီးဆုတောင်းခြင်းကို ပြုလုပ်ကြမည်ဟု ကိုရန်မျိုးအောင်က ဆက်ပြော သည်။