ဘန်ကောက်သံရုံးရှေ့ မြန်မာများ ဆန္ဒပြ

သတင်းနှင့် မီဒီယာကွန်ယက်။
သြဂုတ်လ ၂၆ရက်၊ ၂၀၀၇ခုနှစ်။

မြန်မာပြည်တွင်းမှ ကုန်ဈေးနှုန်းကျဆင်းရေးဆန္ဒပြပွဲများကို ထောက်ခံသည့်အနေဖြင့် ဘန်ကောက်မြို့ရှိ မြန်မာသံ ရုံးရှေ့တွင် ထိုင်းနိုင်ငံရောက် မြန်မာနိုင်ငံသား ၂၀၀ကျော် ယနေ့ နံနက်က ဆန္ဒပြခဲ့ကြသည်။

ချင်းမိုင်မြို့မှ သွားရောက်၍ ဆန္ဒပြခဲ့သူ မဇင်မာဖြိုးက ပြည်တွင်းတွင် စွန့်လွှတ်အနစ်နာခံ ဆန္ဒပြသူများကို အား ပေးထောက်ခံသည့်အနေဖြင့် ဘန်ကောက်သို့ တကူးတကသွားကာ ဆန္ဒပြခြင်းဖြစ်သည်ဟု ပြောပြသည်။

“ပြည်တွင်းထဲက လူတွေတောင်မှနော် ။ ဒီလောက်ဆိုးဝါတဲ့ စစ်တပ်၊ သေမယ်ဆိုတာလဲ သိရဲ့သားနဲ့ တောင် သူတို့ ဆန္ဒပြရဲတယ်။ နောက် ပြည်တွင်းထဲမှာ ဖြစ်တဲ့ ပြဿနာကလည်း ပြည်တွင်းထဲက လူ တွေနဲ့သာ သက်ဆိုင်တာမဟုတ်ဘူးလေ။ ပြည်ပမှာ ရောက်နေတဲ့ မြန်မာတွေနဲ့လည်း သက်ဆိုင် တယ်။ အဲလိုဆိုတော့ သူတို့ထဲမှာ ဒီလိုမျိုးဖြစ်နေတာကို ကြက်သီးထလောက်အောင် တကယ်ပဲ အံသြဂုဏ်ယူတယ်။ အဲဒါကြောင့် သူတို့ကို အားပေးထောက်ခံမှုရယ် နောက်ပြီးတော့ စစ်အစိုးရကို နောက်တခုပြချင်တာက ပြည်ပမှာ ရှိနေတဲ့ မြန်မာတွေလည်း ပြည်တွင်းမှာ ရှိနေတဲ့ မြန်မာတွေနဲ့ တထပ်တည်းပဲဆိုတဲ့ ပုံစံကို ပြချင်လို့ အဲလိုမျိုးသွားတာပဲ။”

ဆန္ဒပြသူများသည်  ဒေါ်အောင်ဆန်းစုကြည် အပါအ၀င် နိုင်ငံရေးအကျဉ်းသားများအား အမြန်ဆုံးလွှတ်ပေးရေး၊ ကုန်ဈေးနှုန်းကျဆင်းရေး၊ ဒီမိုကရေစီရရှိရေး၊ အတုအယောင်အမျိုးသားညီလာခံဖျက်သိမ်းရေး၊ သုံးပွင့်ဆိုင်တွေ့ ဆုံ ဆွေးနွေးရေးစသည့် ကြွေးကြော်သံများကို ကြွေးကြော်ခဲ့ကြသည်။

မြန်မာသံရုံးရှေ့တွင် ထိုင်းရဲ ၄၀ကျော်ခန့်လုံခြုံရေးချထားပြီး သံရုံးရှေ့တွင် ကားများကိုစီတန်းရပ်ထားကား ဆန္ဒ ပြ သူများကို လမ်းဘေးပလက်ဖောင်းပေါ်မှ မဆင်းရန် တားမြစ်ထားသဖြင့် သံရုံးနံရံနှင့် ကားများကြားမှ ကျပ် တည်းစွာ ဆန္ဒပြခဲ့ရသည်ဟု ဆန္ဒပြသူတဦးကပြောသည်။

မြန်မာပြည်တွင်းမှ ဆန္ဒပြပွဲကို ဆန့်ကျင်တားဆီးနေသည့် ကြံဖွံ့အဖွဲ့ဝင်များနှင့် စွမ်းအားရှင်များကို မြန်မာပြည်၏ အကျပ်အတည်းများမှ လွတ်မြောက်စေရေးအတွက် ပြည်သူများနှင့် ပူးပေါင်းပါဝင်ရန် ဆန္ဒပြပွဲကို ဦးဆောင်ခဲ့သူ ဦးကျော်သောင်းက တိုက်တွန်းသည်။

“ပြည်သူတွေဟာ အပြင်ကို ထွက်မယ်ကြံတိုင်း ကြံတိုင်း ပြည်သူတွေ ထွက်တဲ့ အရည်အတွက်ထက် နအဖရဲ့ လက်ကိုင်တုတ် ဒီကြံဖွံ့တို့ စွမ်းအားရှင်တို့ စသည်ဖြင့် ဒီလူဆိုးလူမိုက် လူရမ်းကား အင်အား စုက များနေတယ်။ ဒီနေ့ဒီချိန်ခါမှာ တိုင်းပြည်ကို တိုးတက်အောင်မလုပ်ဘဲ ကိုယ်ကျိူးရှာနေတဲ့ နအဖ ကို ထောက်ခံပြီးတော့ မရပ်ကြပါနဲ့ ပြည်သူတွေဘက်က ရပ်တည်ပါ။ ဒါငါတို့ တတိုင်းပြည် လုံးအတွက် တိုင်းပြည် တပြည်လုံးအနာဂတ် အတွက် သက်ဆိုင်တယ်ဆိုတာကို အသိတရားရှိရှိနဲ့ ပြည်သူတွေအားလုံး ၀န်ထမ်းတွေအားလုံး ပူးပေါင်းပါဝင်မယ်ဆိုလို့ရှိရင် စစ်အာဏာရှင် စနစ်ပျောက် သွားမယ်လို့ ယူဆတယ်ဗျာ။”

ဆန္ဒပြပွဲတွင် မြန်မာ ရွှေ့ပြောင်းအလုပ်သမားအများစုပါဝင်ဆန္ဒပြခဲ့ပြီး ထိုင်းနိုင်ငံမှ အစိုးရမဟုတ်သော အဖွဲ့အ စည်း များနှင့်အတူ ထိုင်းကျောင်းသူ၊ ကျောင်းသား ၃၀ကျော် ပူးပေါင်းပါဝင်ခဲ့သည်။

ထိုင်းအာဏာပိုင်များက ဆန္ဒပြသူများကို ၁၅မိနစ်ခန့်ဆန္ဒပြ ခွင့်ပြုခဲ့သည်။

ကိုရီးယားနိုင်ငံ ဆိုးလ်မြို့ရှိ မြန်မာသံရုံးရှေ့တွင်လည်း ကုန်ဈေးနှုန်းကျဆင်းရေးဆန္ဒပြပွဲများကို ထောက်ခံသည့် အနေဖြင့် မြန်မာနိုင်ငံသားများနှင့် ကိုရီးယားနိုင်ငံသား စုစုပေါင်း လူ၅၀ခန့်ပူးပေါင်းဆန္ဒပြ ခဲ့သည်။