ဒီကေဘီအေ ကားတစီးအား ကေအဲန်အယ်လ်အေ တိုက်ခိုက်

နှစ်ဦးသေ။ ၁၀ ဦးဒဏ်ရာရ

စောရန်နိုင်။                                                                                                                 ဧပြီလ ၃၀ ရက်၊ ၂၀၀၇ ခုနှစ်။

ထိုင်း- မြန်မာနယ်စပ်အနီး မြ၀တီမြို့နယ်အတွင်း တိုးတက်သော ကရင်ဗုဒ္ဓဘာသာ တပ်ဖွဲ့ (ဒီကေဘီအေ) ပိုင် ကားတစီးကို ကရင်အမျိုးသား လွတ်မြောက်ရေး တပ်မတော် (ကေအဲန်အယ်လ်အေ) တပ်ဖွဲ့က ယနေ့နံနက် ၈ နာရီခန့်၌ ပစ်ခတ်တိုက်ခိုက်ခဲ့ရာ ဒီကေဘီအေဘက်မှ ၂ ဦးသေဆုံးပြီး ၁၀ ဦး ဒဏ်ရာရရှိခဲ့သည်။

သင်္ကန်းညီနောင်နှင့် မြ၀တီမြို့ကြား ကားလမ်းပေါ်တွင် ဒီကေဘီအေ တပ်ရင်း ၉၀၇ ပိုင် ကား တိုက်ခိုက်ခံရခြင်း ဖြစ်သည်။

အဖြစ်အပျက်နှင့် ပတ်သက်၍ ဒီကေဘီအေမှ အမည်မဖေါ်လိုသည့် ရဲဘော်တဦးက ယခုလို ပြောသည်။

“မနက် ၈ နာရီ လောက်က ကျနော်တို့ ဒီ တပ်မဟာ ၆ ဂွင်မှာရှိတဲ့ ကေအဲန်ယူကနေပြီးတော့ ကျနော် တို့ ဒီကေဘီအေ ကားကို ပစ်တယ်။ ကျနော်တို့ ဒီတံတားကျိုးနားမှာပဲ၊ တောင်ပေါ်လမ်း တံတား ကျိုးနားမှာပဲ၊ အဲဒီကားက ကျနော်တို့ အောက်ကနေ အပေါ်ပြန်တက်လာတာ။ အရပ်သား ၅ ယောက် ဒဏ်ရာရတယ်၊ တယောက်ကတော့ သေသွားတယ်၊ စစ်သားက ယာဉ်မောင်းတဲ့လူတယေက် ကျသွား တယ်၊ ငါးယောက် ဒဏ်ရာရတယ်။ သူတို့ ဆွဲမိုင်းနဲ့ ဆွဲပြီးတော့ ပစ်နေတယ်။ ဒီကနေ ကျနော်တို့ ခံပစ်တဲ့ အခါကျတော့ သူတို့ ပြန်ပြီးတော့ ဆုတ်သွားတယ်။”

ဒီကေဘီအေ ကားကို ကေအဲန်အယ်လ်အေ တပ်ဖွဲ့များက ပစ်ခတ်ခဲ့သည်ဆိုခြင်းမှာ မှန်ကန်ကြောင်း ကေအဲန်ယူ ဗဟို၏ စည်းရုံးရေးနှင့် ပြန်ကြားရေးဌာနမှ အတွင်းရေးမှူးဖြစ်သူ ဗိုလ်မှူး စောလှငွေက ပြောသည်။

“ကျနော်တို့ မြ၀တီနဲ့ သင်္ကန်ညီနောင်ကားလမ်းပေါ်မှာ၊ မြ၀တီဘက် တက်တဲ့ကားကို အဲ့ဒီကျနော်တို့ ခမရ ၃၅၆ နဲ့ မနီးမဝေးတနေရာမှာ အဲ့ဒီလမ်းအကွေ့မှာ ဒီဘက်ကနေပြီးတော့ တပ်မဟာ ၆ က တပ်ဖွဲ့တွေ တိုက်ခိုက်တယ်၊ အဲဒီကားကို။ အဲဒီကားကို သူများအသိများတာက ဗိုလ်ကျွဲရိုင်း ရဲ့ကားလို့ ပြောတယ်။ အဲ့ဒါကတော့ ဗိုလ်မှူး နှုတ်ခမ်းမွေးရဲ့ လက်ထောက်လို့ပြောတယ်။ သွားပစ်တာကတော့ တပ်မဟာ ၆ က အထူးတပ်ဖွဲ့တွေပေါ့။ ဗိုလ်မှူးလှမင်းတို့ အဖွဲ့တွေပေါ့။”

ယခုလအတွင်း ကေအဲန်ယူ အခြေစိုက်ရာ တပ်မဟာ ၇ စခန်းအချို့ကို မြန်မာစစ်တပ်နှင့် ဒီကေဘီအေ ပူးပေါင်း တပ်များက တိုက်ခိုက်သိမ်းပိုက်ပြီးနောက်ပိုင်း ကရင်လက်နက်ကိုင် အဖွဲ့များဖြစ်ကြသော ကေအဲန်ယူနှင့် ဒီကေ ဘီအေ အဖွဲ့တို့အကြား တင်းမာမှုများ ပိုမို ကြီးထွားလာခဲ့သည်။

တိုက်ခိုက်ခံရသည့် ဒီကေဘီအေတပ်ဖွဲ့ပိုင်ကားတွင် ဒီကေဘီအေစစ်သား ၁၀ ဦးနှင့် အရပ်သား ၁၀ ဦး လိုက်ပါ စီးနင်းလာခဲ့သည်ဟု ဒီကေဘီအေမှ ရဲဘော်က ပြောသည်၊ ဒဏ်ရာရရှိသူများကို မြ၀တီဆေးရုံတွင် ဆေးကုသ ပေးလျက်ရှိသည်။